Día Internacional da Amizade

Seguro que moit@s de vós conservades algunha amizade nacida na infancia, que xa considerades parte desa familia, que, malia non ser de sangue, é de corazón. Ao longo da nosa existencia, esta cadea de afectos escollidos vai medrando ata se converter na nosa rede de seguridade emocional.

As rapazas e rapaces de hoxe ampliaron o seu círculo de socialización coa irrupción das RRSS nas súas vidas e, nelas, "coñecid@s" e mesmo "persoas tóxicas" refuxiadas no anonimato poden chegar a usurpar un espazo concibido para as relacións de amizade. Por iso é tan importante que na etapa da adolescencia os guiemos polos camiños virtuais para que, na busca da súa identidade, non se deixen levar por enganos ou falsas personalidades.

Hoxe reivindicamos a auténtica amizade, ese sentimento que engloba moitos outros e todos eles positivos. A sabedoría popular fala da súa grandeza no refrán quen ten un amigo ten un tesouro e nós non podemos estar máis de acordo con esa afirmación.

Suxerímosvos que celebredes este Día Internacional da Amizade cos amigos que temos en común, os libros; e máis concretamente, c’Os amigos do Nicolasiño, que están desexando coñecervos e que os coñezades.